ARÈT SOUPLÉNÉ

Zartik té finé difizé dopi avan dosi bann Blog mwin la vé fé astèr zot i rotrouv dosi mon blog bann kozé mwin la romèt azour, mé lé touzour dan tan.

Bann rénioné i défann sistinm départmantalis dann koloni Larénion é la swazi modèl fransé kan néna po ginyé i bouz pa mé kan léta fransé i aplik son bann lwa lapa kontan lé normal dan lo sistinm nout péi lé dodan ninport kisa na lo drwa nir travay isi, akoz bann rénioné i sava laba é si lo rénioné i vé alé andéor lès azot. 

Ala in kozé po sat lapo batay po mèt anplas (préférence régionale, priorité travail pour le réunionnais, done travay kréol...) po fini èk sa sèl solision sé prann zot péi anmin po arèt larg zot gro pléré kolonizé èk zot moman kolonialis fransé mé pran zot péi anmin po linstan lé dir po zot pars nora pi fasilté, gro larzan é la bèlvi bourzoizi lokal alé po ansèv fé pèr azot san lafrans zot lé mor. 

Alor zot batay po sat zot i domand lé in fo déba oubli pa Larénion lé in départman fransé kan zot i défann stati-là koman zot i pé anpès dot domoun lé zot départman fransé nir travay Larénion. 

Ankor in fwa po démalol zot zié po fini èk tousala é diriz nout bato fo pran anmin zot destin tank zot lapa konpri sa bin kontinié larg zot gro pléré kolonizé zot i kroir gouvèrnnman wa ékout azot, rèv pa bann kolonizé rénioné.

Po konèt : Kopiaz roprodiksion intèrdi. 

Si zot i ropran mon lartik po fé konèt oubli pa di ousa i sort mi kont si zot.

Monkozé